اسألي الخبراء

قلق الانفصال طبيعي جداً في هذا العمر. لتخففي عليك وعليها هذا القلق ممكن تبدأي بأنك تقضّي 'وقت خاص' معها. الوقت الخاص هذا ممكن اتسميه باسمها (مثلاً 'وقت جنى') 

بتقضي معها ربع ساعة بس بشرط يكون كامل تركيزك فيه معاها هيه بس. بدون موبايل، تلفزيون او اي شئ ثاني. العبي معها، خليها تلعب لحالها بس علّقي على اللي عم تلعبوا...... الخ. و بتحطي المنبه يرّن بعد هل ربع ساعة. و لمى ينتهي الوقت بتقوليلها 'هلا خلص وقت جنى، منرجع منلعب بكره. هلا ماما عندها شغل تاني' اول اكم مرة ممكن تتضايق بس بعدين اذا بتكرري هاد الوقت كل يوم رح تتعود انه اذا خلص اليوم في كمان بكره. 

ممكن كمان تحاولي و انت بتلعبي معاها بالبيت او بالحديقة، تكوني جالسة بجانبها اوّل اللعب. و شوي شوي تبعدي عنها. بس المهم اتضل شايفتك. هيه رح تكمل لعب بس رح اتضل أتدور عليكي عشان تتطّمن. و لما ترفع عينيها لتدوّر عليكي اشريلها بإيدك او نادي عليها. ممكن الابتعاد هاد ما يأثر عليها وتكمل لعب عادي. وممكن تبكي وتترك اللعب. بهاي الحالة ممكن تعبطيها وترجعيها لمكان اللعب.